Hanes

Daeth y Ty Gwydr i fod mewn cyfnod pan oedd angen cyfleusterau swyddfa a man cyfarfod ar nifer o fudiadau gwirfoddol. Daethom o hyd i adeilad i’w brynu gyda’n gilydd er mwyn rhannu costau a chyfleusterau. Gan fod prinder llefydd o’r fath yn yr ardal, gwyddem y byddai grwpiau eraill yn defnyddio’r adeilad hefyd.

Byddai’r Ty Gwydr/Greenhouse yn fan lle gallai grwpiau ifanc dyfu.

Ers y dechrau ym 1982, mae dros 60 o grwpiau cymunedol, mudiadau a busnesau bach lleol wedi elwa ar gyfleusterau’r Ty Gwydr. Yn eu plith mae grwpiau amgylcheddol fel BTCV a Lonydd Glas Gwynedd, grwpiau menywod fel Cymorth i Ferched, prosiectau iechyd fel y Fforwm Defnyddwyr Iechyd Meddwl a’r Ganolfan Gwybodaeth Iechyd, grwpiau ymgyrchu fel y Llinell Lesbiaid a Chj ymdeithas yr Iaith Gymraeg, a phrosiectau celfyddydol fel Syrcas Circus. Cynhyrchwyd cylchgronau a newyddlenni yn y Ty Gwydr hefyd, a buom yn ganolfan ar gyfer prosiectau llety, cyngor i’r digartref a phrosiectau galw-heibio, yn ogystal ag yn fan gweithio i therapyddion meddygaeth amgen.

Rydym wedi rhagori ar ein disgwyliadau wrth i lu o grwpiau a phrosiectau sydd heb lawer iawn o adnoddau gael y gefnogaeth angenrheidiol yma er mwyn iddynt dyfu a symud allan i’r gymuned ehangach. Ceir rhestr lawn o grwpiau preswyl y Ty Gwydr, o’r dechrau hyd yn awr, yng nghefn yr adroddiad hwn.